You are currently browsing the monthly archive for Mei 2009.
Ampir seminggu di rume ogut lagi pade “ngompol” ngomongin politik, ngga orang lelaki ngga orang perempuan same pade, same gilenye.
Canggih canggih banget ngomongin bakal calon persiden ame wakilnye. Atu atu di omongin mulain tampangnye, bandanye, kesemenggahannye, omongannye!. Dalem!
“Pegimane sih, Cang Beye (SBY-red) milih wakil ngga semenggah!” kata orang perempuan (ema ogut-red). “Dari mane tuh asal muasalnye, nah kontan milih Si Budionoh! ngga ade angin ngga ade ujan!” kata ema ogut lagi (nyerocos).
“Mending dia pilih Bang Fatul (Persiden PKS-red) buat wakilnye, ude orangnya ganteng, adem diliat, sopan ame perempuan, mesem terus, mukenye ajer!” Kata ema ogut lagi sembari nunjuk ke TV.
“Eh, tong kalo dia mao juga, gua udeh kawin ame dia!! Gare gare ketemu babeh luh aje gua kawin!”
“Aduh! gue ceneh bener liat Mpo Mega yang ribut aje soal sembako, demennye nyindir pemerentah, emang sih jaman die sembako murah, tapi itukan dulu. Nah, coba sekarang duit mikin gede belanje mingkinan gede, anak sekoleh yang banyak beaya” Kata Si Babeh sewot.
“Coba liat yang peduli negare ude benyenyeh mulutnya tapi belom ade perobahan, pegimane tong? elu pan anak muda penerus bangse?” tanya Babeh ke Ogut.
“Bodo amat, yang penting Ogut bisa makan-berak saban ari, idup tenterem, adem ayem!”
“Dasar goblog luh, kalo keadaan kaco, pegimane idup tenterem! yang ade juga ribut, rusuh sono sini” Jawab Babeh keki.
“Abing pegimane, Beh? ngga lanang ngga wadon persidennye, belom ada perobahan!” “Tapi denger denger Prabowo mao bawa angin perobahan!” kate Babeh niruin suara burung garuda-nya Gerindra.
“Kwak…kwak….” kata Babeh sembari ngepek ngepekin tangannya. “Belom tengtu, Beh itu kan cumanan iklan!, biar menarik” Kata Ogut ngga mao kalah. “Dasar aki aki ngga semenggah!”
Ade kali 6 orok yang berojol 1-2 bulanan ini (di kampung ogut), he he jadi rame puteran duit beredar. Banyak selametan saban minggunya.
Yang selametan bikin nama gitu. Akekahan motong kambing, panggil panggil warga bekumpul di rumeh ngga lupa manggil ustad biar barokah, apdol. Amin!.
Warga seneng seneng aja bekumpul sembari isep puntungan, pulang bawa gembolan “nasi + gule kambing”, ngga lupa tuh ama acar dikit.
Kalo yang orang gedean bangsa pengurus RT/RW sebelom pulang warga di jamu makan bersama, makan gule jeroan rame rame. Perut wareg pulang bawa oleh oleh buat bini.
Semakin banyak selametan bikin nama, semakin banyak juga orok bakalan lahir. Coba bayangin daging kambing bikin gaerah malem……alias bikin gerah…bikin Hot.
Apalagi gule-nya bikin “kepale” puyeng, eneg pengen “gumoh!” ^.^
Maonya buru buru ngelonin bini…..
Pegimana kalo didaerah sudare sudare?
Namenye juga Acong, ngga gablek Reboes, KTP gambar monas boro-boro, ada juga KTP kampung yang udah liwat tanggal. Puguh urusan ma pulisi.
Tapi bukan itu lantarannya di tilang pulisi. Menurut Acong yang curhat ama ogut. Begini kejadian yang sebenernya.
Malem malem pulang nganterin Si Bohay di Menteng Dalem, Acong pulang ke kontrakannya di Palmerah. Di situ kejadiannya, di kolong Slipi. Lagi enak enak mancal shogun baru, “prittt!” eit, di suru minggir. Kena deh semua. Mana duit cuman gocap gocapnya doang, ilang deh buat nge-jajanin pulisi.
Tapi yang bikin rada keki-in Si Acong, waktu di tilang bukannya SIM, STNK ato apa yang ditanyain. Tapi yang ditanya kenapa motornya pake spion merah yang menyala nyala lantaran lampu, kenapa motornya di kasih lampu warna warni. Buat apa ini buat apa itu?
Pantes sekarang jogrokan motornya balik lagi ke standar pabrik….
Dulu waktu Ogut sekola TK kalo mao libur pasti nyanyiin lagu megaloman fire. Tandanya besok libur…he he..
Komen Terakir