Perang Saudara

Perang sudare! Jangan deh ampe kejadian lagi perang antar sudare (suku, etnis, agama) di negeri ini. Ude pegel ibu pertiwi nangis menahan beban yang ngga kekira kira. Yang untung kan bangsa laen, negara laen, terutama barat ame australia (katenye-red).

Mending kita perang ame orang laen, ame bule gitu jadi gampang bedain mane yang musuh mane yang temen. Nah kalo perang sudare rada susah bedainnya.

Omong omong sudare, bangsa kita pan masing sudare ame Malaysia. Tapi kalu mao perang, boleh boleh aje ^.^ he he. Tapi perang yang bener bener karena Kedaulatan Negara. Jangan lantaran urusan rumeh tangga artis (yang lagi top-red),

Banyak manfaatnya nih (kira-kira).

• Kekuatan personil militer meningkat, TKW/TKI di Malaysia pasti pade masuk militer minta dipersenjatai (buat bales dendam-mungkin).
• Pengangguran berkurang, kirim aje semua pengangguran buat perang!
• Jumlah penduduk menurun drastis, pegimane ngga menurun orang banyak yang mati ikut perang.
• Kriminal menurun, pengangguran ude sedikit dan kirimin aje copet jadiin intel sama penjahat terminal buat timsus.
• Bos lapak kebanjiran order dari PINDAD, banyak permintaan besi rongsokan buat di jadiin pestol ame pelor.
• Harga bangbu naek terutame bangbu kuning buat bangbu runcing. Wah yang punya kebon bangbu pasti untung.
• Pemulung / tukang beling go internasional, rame rame nyari rongsokan perang ame pecahan bom, syukur syukur dapet emas. Ketimbang di sini harga gelas aqua lagi turun.
• Stok beras berlebih (mencukupi-red) , banyak yang mati akibat perang, beras ngga ada yang makan.
• Paranormal diem diem kebanjiran order, terutame banyak yang minta elmu kebal (fakta), elmu anti pelor.
• Tukang jait juga banyak pesenan, baju seragam ame kantong mayit.
• Si buyung (biasanya) tukang kalung di pasar malem kebanjiran order bikin nama buat kalung tentara.
• Dan laennye yang ngga keingetan.

Pegimane sudare sudare setuju kaga???
Mari kita nyanyiin lagu kebangsaan…

pulisi tidur

Kenape kudu pasang pulisi tidur? ape faedahnya? ape mangfaatnya?
Kalo ngga dipasangin pegimane? Bahaya?

Mangfaat ato ngganya, baik ato buruknya semue tergantung dari sisi mane kita liat. Semua ade mangfaat ade juga kekurangannye. Soal pulisi tidur/tanggul di jalanan, emang bermanfaat emang juga ngga beguna alias nyusahin. Itu juge tergantung dimane dipasangnye.

Mungkin masudnya biar motor ame mubil kaga ngebut ngebut, banyak bocah alus seliweran. Tapi juga kadang bikin orang jatoh ame kesandung. Soal pulisi tidur di jalanan (di perumahan-pemukiman padet) kadang juga berlebihan, ngga kire kire tingginye, bukan mangfaat malah apes.

Ini banyak di daerah yang Ogut liwatin (Kapuk ame cengkareng) coba sudare sudare peratiin. Jarak 2 meter ditanggul, kesono-an dikit ditanggul. Ude gitu lampu penerang jalan remeng remeng kaya warung di Parung.

Aduh kaga puguh laguh. Ude gitu ngga yang kecil ngga yang bangkotan pade demen banget maen di jalanan. Bahaya tau….!

Emang siih warga ngga bisa disalain, yang naek motor juga ngga mao disalain juga, jadi yang salah siape??

kenapa Manohara? (sebuah pendapat)

Melek mata yang pertama Ogut denger bukan suara azan subuh (kesiangan-tapi ampir saban ari) tapi suara orang yang ngberitain Manohara.

Pulang kereja nengok TV isinya manohara, lagi Onglen (online) isinya manohara. Apa HEBAT-nya dia?

Tuhan aja jarang diberitain. Orang ude ngga ade kerjaan (Ogut juga kali ye) bahas si Manohara. Apalagi liat emak-nya di TV Ogut kurang simpati (demi Tuhan)….

Boleh dong ngasih pendapat….

Pegimane ngga simpati, dulu katenye waktu Manohara mao ame Datuk ato apalah,  emaknya nerime aje. Eh, sekarang kebalikannya, Jangan Jangan dulu anaknya dia jual ke Datuk (maaf maaf nih).

Ato emang aji mumpung… ^.^

Boleh dong ngasih pendapat….

Peduli SETAN, apapun beritenye. Apa harga diri BANGSA cuman Manohara. Itu kan urusan pribadi jangan bawa bawa negara, jangan bawa bawa pemerentah.

Inget dulu waktu kawin apa bawa bawa pemerentah (RI), nah kawinnye aje di bawah umur (katenye) JELAS JELAS ngga sesuai UU. Seh Puji aja di kasus-in lantaran ngawinin bocah yang masing bau Chiki (bau2 gurih-red).

Jangan rase Nasionalisme kita kepancing lantaran gosip begituan ahh. Malu perang (perang sudare) cuman gara gara begituan doang.

Bodo ahh…..
Terserah pendapat sudare sudare….

koh iong (bukan nama sebenernya) sedih

“Tumben amat luh koh?” tanya Saik di dapur.

“Pusing…!”, kata Koh Iong sambil isep samsu. “Ngapain luh maen kebelakang, kasir luh di bawa maling tau rasa luh!” tanya Saik lagi. “Bodo amat, amsiyong gua dibikin” jawab Koh iong.

“Sialan!, sikut sana sikut sini, injek sana, injek sini, ntar Bos gua injek injek!….#*@!!”

“sabar Koh, sabar!” kata Saik.
“Mengkenye jangan pelit pelit” kata Saik dalem atinya.

temen makan temen

Si Bedul ude sebulan manyun terus, ude dasarnya tukang ngambek eh semakin monyong. Si Mamang ude greget banget, mao nge-jitak batang anunya.

Eiiit, Sabar Bos! tanya dulu nape Bedul begitu, jangan mare mare aje.

Si Saik yang temen curhatnya ngga tau ada apa gerangan, Si OM temen sebantal-nya (waktu bujangan) juga kurang paham. Ape gara gara urusan wadon?

Ogut jadi curiga! Emang biasa dia patah hati, sakit ati di tinggalin perempuan. Tapi maslah ini beda, apa berantem ama bini-nya? tapi kemaren akur pas Ogut maen PS di rumenye. Lagi juga dia ude ngga ngontrak, ude rujuk ama bininya.

Waduh jangan jangan keseringan di gedik ama Mamang, ato kebanyakan di semprot Mandor Daus. Eh, jangan jangan lagi jatoh cinta lagi ama anak PKL, Si Nopi yang badannya sekel kaya paya rujak.

Au ah! Ogut ngga paham juga. Tapi lama lama urusan runyem, siape yang mao bantuin Ogut bikin Buah ame Kue. Cuman Bedul doang yang rada rajin (asal ade sajennye-roko super).

Tapi kalo ngga saleh kemaren dia pernah cerita, dia di zolimin Koh Awang. Lantaran mr.xxx tapi ngga cerita banyak.

Mudahan besopan Bedul ude sumbringah lagi, nyengir lagi kaya Jaing. Udu kalo ngga ade Bedul.

Dul, Dul sabar tong!.